عمران طاہر کی ہیٹ ٹرک، ملتان سلطانز کے فین خوشیوں کے ساتویں آسمان پر اُڑنے لگے


شارجہ (24 نیوز) پاکستان سپر لیگ کے تیسرے ایڈیشن میں ملتان سلطانز نے اپنی دھاک بٹھا لی ہے۔ پی ایس ایل تھری کے اب تک کے سب سے کامیاب بولرز ملتان سلطانز ہی کے لیگ اسپنر عمران طاہر ہیں جنھوں نے کوئٹہ گلیڈی ایٹر ز کے خلاف ہیٹ ٹرک کی۔

عمران طاہر نے کوئٹہ گلیڈی ایٹرز کے خلاف 16ویں اوور کی دوسری گیند پر حسان خان کو کلین بولڈ کیا اور اگلی ہی گیند پر انہوں نے نئے آنے والے کھلاڑی جان ہیسٹنگز کو بھی بولڈ کردیا۔

ملتان سلطانز کے لیگ اسپنر نے اپنے اوور کی چوتھی گیند پر راحت علی کو ایل بی ڈبلیو کر کے نا صرف کوئٹہ گلیڈی ایٹرز کو 102 رنز تک محدود کر دیا بلکہ انہوں نے پاکستان سپر لیگ میں اپنی پہلی اور ٹورنامنٹ کی تیسری ہیٹ ٹرک بھی مکمل کی۔

ہیٹ ٹرک کرنے والے عمران طاہر کا کہنا تھا کہ مجھے نہیں پتا کہ اچانک کوئٹہ کے ساتھ کیا ہوا، سرفراز اچھا کھیل رہے تھے اس لیے میں ان کے خلاف حکمت عملی ترتیب دے رہا تھا۔ عمران طاہر کا کہناتھا کہ وکٹ اسپنرز کے لیے مددگار نہیں تھی لیکن ایک ٹیم کے طور پر ہم بہت عمدہ کھیلے۔

ان کا کہنا تھا کہ میں ہمیشہ مختلف ورائٹیز پر یقین رکھتا ہوں اور یہی چیز  میرے اور ٹیم کے لیے کا م کر گئی۔ انہوں نے کہا کہ میری آج کی پرفارمنس اہلیہ اور بیٹے کے نام ہے جو بہت دور سے میچ دیکھنے کےلیے یہاں آئے ہیں۔

خیال رہے کہ پاکستان سپر لیگ میں پہلی ہیٹ ٹرک محمد عامر نے کی تھی جبکہ ٹورنامنٹ کی دوسری اور تیسری ہیٹ ٹرک رواں سیزن میں ہی بنائی گئیں۔ دونوں ہیٹ ٹرکس ملتان سلطانز کی جانب سے کی گئیں جو پاکستان سپر لیگ میں اپنا پہلا سیزن کھیل رہی ہے، پہلی ہیٹ ٹرک جنید خان نے لاہور قلندرز کے خلاف بنائی تھی۔

ملتان سلطانز کے چاہنے والوں کا کہنا ہے کہ ہم خوشیوں کے ساتویں آسمان پر اُڑ رہے ہیں۔ اب عمران طاہر نے ہیٹ ٹرک کی ہے اور اس سے پہلے لاہور قلندرز کے خلاف جنید خان نے ہیٹ ٹرک کی تھی۔ ہماری دعائیں ملتان سلطانز کے ساتھ ہیں اور یہ فائنل جیتیں گے۔

ہیٹ ٹرک کرنے کے بعد گفتگو کرتے ہوئے عمران طاہر نے کہا کہ سچ بتاؤں تو مجھے نہیں پتہ کہ یہ کیا ہوا ہے کیونکہ سرفراز احمد اچھا کھیل رہے تھے اور میں اس حوالے سے منصوبے بنا رہا تھا لیکن بحیثیت ٹیم ہم نے اچھی کارکردگی کا مظاہرہ کیا۔

انھوں نے کہا کہ میں اپنی یہ پرفارمنس بیوی اور بیٹے کے نام کرتا ہوں جو مجھے دیکھنے کیلئے جنوبی افریقہ سے یہاں شارجہ آئے ہیں۔

واضح رہے کہ عمران طاہر پی ایس ایل میں ہیٹ ٹرک کرنے والے پہلے غیر ملکی کھلاڑی ہیں۔