ہمیں پکڑنے کے بعد ثبوت ڈھونڈے جا رہے ہیں:سعد رفیق

ہمیں پکڑنے کے بعد ثبوت ڈھونڈے جا رہے ہیں:سعد رفیق


اسلام آباد( 24نیوز )مسلم لیگ (ن) کے رہنما خواجہ سعد رفیق ریلوے خسارہ کیس میں سپریم کورٹ میں پیش ہوگئے،ان کا کہنا تھا کہ حکومت ملک چلانے کے بجائے اپوزیشن بھگانے کے چکر میں ہے اور ہمیں پکڑ پہلے لیا گیا اور ثبوت بعد میں ڈھونڈے جا رہے ہیں۔

ریلوے خسارہ کیس میں پیشی کے بعد گفتگو کرتے ہوئے خواجہ سعد رفیق نے کہا کہ ہمارے خلاف ثبوت اب ڈھونڈے نہیں بلکہ گھڑے جا رہے ہیں، پاکستان میں روایت ہے کہ ملک بنانے والوں کی اولاد کو جیل جانا پڑا ہے اور اگر آپ پاکستان سے پیار یا جمہوریت کی بات کریں تو آپ کے ساتھ ایسا ہی ہوگا، سیاستدانوں کو ایک دوسرے کو چور چور کہنے کے بجائے اصل ایشوز پر بات کرنا ہوگی۔

اس سے قبل سپریم کورٹ میں ریلوے خسارہ کیس کی سماعت شروع ہوئی تو خواجہ سعد رفیق کو کمرہ عدالت میں دیکھتے ہوئے چیف جسٹس نے کہا یہ خواجہ صاحب کو ہم تو نہیں بلاتے یہ کیوں آتے ہیں، ہم نے آڈیٹر جنرل سے جواب مانگا تھا،جس پر سعد رفیق کے وکیل کامران مرتضیٰ نے کہا آڈیٹر جنرل نے لاہور میں جواب جمع کرایا ہے، جس پر چیف جسٹس نے کہا اگلے ہفتے جواب آجائے تو کیس سنیں گے۔

عدالت نے ریلوے خسارہ کیس کی سماعت اگلے ہفتے تک ملتوی کر دی۔