الیکشن کمیشن نے عمران خان کی معافی قبول کرتے ہوئے خوشخبری سنادی


اسلام آباد( 24نیوز )پی ٹی آئی چیئرمین عمران خان کی ایک اور مقدمے سے خلاصی ہوگئی،الیکشن کمیشن نے ووٹ کی رازداری ظاہر کرنے سے متعلق کیس میں معافی قبو ل ہوگئی، نوٹس بھی واپس ہوگیا۔
دوسری جانب این اے 53 اسلام آباد سے عمران خان کی کامیابی کا نوٹیفکیشن جاری کرنے کا حکم بھی دے دیا گیا،عمران خان کے چاروں حلقوں سے کامیابی کے نوٹیفکیشن مکمل ہوگئے۔
چیف الیکشن کمشنر سردار رضا کی سربراہی میں 4 رکنی بینچ نے آج عمران خان کے خلاف ووٹ کی رازدری ظاہر کرنے سے متعلق کیس کی سماعت کی،سماعت کے دوران عمران خان کے وکیل بابر اعوان نے اپنے موکل کا دستخط شدہ معافی نامہ اور بیان حلفی جمع کرایا جس میں الیکشن کمیشن سے نوٹس واپس لینے کی استدعا کی گئی تھی۔
بیان حلفی میں چیئرمین تحریک انصاف کی جانب سے کہا گیا کہ 'میں تمام رولز پر عمل کرتا ہوا ووٹ ڈالنے اندر اکیلا گیا تھا، تاہم رش کے باعث پردے کی اسکرین گرگئی تھی، جب میں نے پولنگ اسٹاف سے پوچھا کہ ووٹ کہاں ڈالوں تو اسٹاف نےکہا کہ ٹیبل پر ہی بیلٹ پیپر رکھ کر کاسٹ کردیں۔
جواب میں مزید کہا گیا کہ ٹیبل کے اطراف مہر لگاتے وقت میڈیا اکٹھا تھا، میڈیا نے میری مرضی یا اجازت کے بغیر تصاویر اور فوٹیج بنائی، میں نے جان بوجھ کر ووٹ کی رازداری ظاہر نہیں کی اور اس میں میرا کوئی کردار نہیں تھا، لہٰذا اپنے اس غیر ارادی اقدام پر الیکشن کمیشن سے غیر مشروط معافی مانگتا ہوں۔
واضح رہے کہ 25 جولائی کو ہونے والے عام انتخابات میں چیئرمین تحریک انصاف عمران خان جب اپنا ووٹ کاسٹ کرنے این اے 53 اسلام آباد کے پولنگ اسٹیشن پر گئے، تو انہوں نے پولنگ بوتھ کے پیچھے جاکر مہر لگانے کی بجائے میڈیا کے سامنے ہی بیلٹ پیپر پر مہر لگائی، جس کا الیکشن کمیشن نے نوٹس لیا تھا۔

یہ بھی پڑھیں:   صدر مملکت نے قومی اسمبلی کا اجلاس 13 اگست کو طلب کرلیا
الیکشن کمیشن نے عمران خان کی جانب سے بیان حلفی اور حلف نامہ دینے کے بعد کیس کا فیصلہ محفوظ کرلیا، جو کچھ دیر بعد سنایا گیا،الیکشن کمیشن کے ممبر سندھ، خیبرپختونخوا اور بلوچستان نے نوٹس واپس لینے کی رائے دی۔
یاد رہے کہ گزشتہ روز الیکشن کمیشن نے ووٹ کی رزاداری ظاہر کرنے پر وکیل بابر اعوان کا تحریری جواب مسترد کرتے ہوئے عمران خان سے آج دستخط شدہ معافی نامہ اور بیان حلفی طلب کیا تھا۔
واضح رہے کہ عمران خان پی ٹی آئی کی طرف سے وزیر اعظم کے امیدوار بھی ہیں،صدر مملکت نے نومنتخب قومی اسمبلی کا اجلاس 13اگست کو طلب کرلیا ہے،پہلے اجلاس میں تمام ارکان اسمبلی حلف اٹھائینگے۔