ہمارا نظام عدل ہر اس شخص کا مقروض ہے جس نے ووٹ ڈالا:مریم نواز


شیخوپورہ(24نیوز) سابق وزیراعظم نواز شریف کی صاحبزادی مریم نواز نے کہا ہے کہ ہمارا نظام عدل ہر اس شخص کا مقروض ہے جس نے ووٹ ڈالا، نواز شریف کے ساتھ ہونے والے مظالم کے قرض کون چکائے گا۔
تفصیلات کے مطابق جلسے کا پنڈال دو گراؤنڈز میں بنایا گیا ہے جب کہ شہر کی سڑکوں پر سابق وزیراعظم نواز شریف اور مریم نواز کے خیر مقدمی بینرز بھی آویزاں کیے گئے ہیں، مریم نواز نے اپنے خطاب کے دوران کہا کہ ہمارا نظام عدل ہر اس شخص کا مقروض ہے جس نے ووٹ ڈالا، نواز شریف کے ساتھ ہونے والے مظالم کے قرض کون چکائے گا۔
سابق وزیراعظم کی صاحبزادی نے کہا کہ کیا پاکستان کا اسی طرح تماشا بنتا رہے گا، کیا اس ناانصافی کے خلاف آپ کچھ کریں گے، نواز شریف کو گالی دینے والے منصفوں نے ہی ان کا فیصلہ سنانا ہوگا، نواز شریف کو عوام کی محبت اور عشق کی سزا ملتی ہے۔
مریم نواز نے مزید کہا کہ مائنس نواز شریف کے فارمولے پر کام کرنے والوں کو ناکامی ہوئی، نواز شریف کو بدلے میں عوام کی محبت اور عشق ملا اور وہ وقت آرہا ہے جب آئینی اور قانونی جے آئی ٹی بنے گی۔
سابق وزیراعظم نواز شریف کی صاحبزادی مریم نواز کی تاج پوشی کے لیے انجمن تاجران شیخوپورہ کی جانب سے پانچ تولہ سونے کا خصوصی تاج بھی بنوایا گیا ہے۔
ڈی پی او شیخوپورہ کے مطابق مسلم لیگ (ن) کے جلسے کی سیکیورٹی کے لئے پولیس کے 1800 اہلکار تعینات ہیں جن میں 1500 اہلکار جلسہ گاہ اور اطراف جب کہ 300 اہلکار مختلف راستوں پر تعینات کیے گئے ہیں۔

اظہر تھراج

صحافی اور کالم نگار ہیں،مختلف اخبارات ،ٹی وی چینلز میں کام کا وسیع تجربہ رکھتے ہیں