25جولائی کو ووٹ کی طاقت سے نواز شریف اور ان کی بیٹی کو باہر لانا ہے، شہباز شریف



  سرگودھا ( 24نیوز )  انتخابی جلسے سے خطاب کرتے ہوئے شہباز شریف نے کہا کہ نواز شریف 13 جولائی کو بیٹی کے ساتھ بیمار اہلیہ کو چھوڑ کر لندن سے پاکستان پہنچے انہیں بیمار والدہ سے ملاقات کی بھی اجازت نہیں دی گئی، دونوں باپ بیٹی کو جیل کی سلاخوں کے پیچھے ڈال دیا گیا۔

  شہباز شریف نے چیئرمین تحریک انصاف عمران خان پر تنقید کرتے ہوئے کہا کہ جھوٹے خان، الزام خان اور بہتان خان روز ایک بات کرتا ہے اوریوٹرن لیتا ہے، جتنے پاکستان میں یو ٹرن کے نشان ہیں وہاں عمران خان کی تصویر لگائی جائے۔شہبازشریف نے کہا کہ عمران خان نے پشاور میٹرو کا بیڑا غرق کردیا، پشاور میٹرو کا ٹھیکہ بلیک لسٹ کمپنی کو دیا گیا، پورا پشاور کھنڈر بن چکا ہے۔

یہ بھی پڑھیں:عوام اس بار متحدہ اور یوٹرن لینے والوں کو ووٹ نہیں دینگے:بلاول 

صدر مسلم لیگ ن نے مزید کہا کہ 25 جولائی کو شیر کو ووٹ دینا ہے، پشاور میٹرو میں 40 ارب روپے کی کرپشن ہوئی، جس نے 40 ارب روپےکا فراڈ کیا، کیا اس فراڈیے کو آپ ووٹ دیں گے؟ انہوں نے کہا کہ ن لیگ نے پورے پاکستان میں موٹرویز کے جال بچا دیے، اسے گرفتار کیا گیا جس نے ایٹمی دھماکے کرکے پاکستان کو عظیم قوت بنایا۔انہوں نے جلسے کے حاضرین سے استفسار کیا کہ کیا آپ پشاور کی طرح پنجاب کو برباد ہوتا دیکھ سکتے ہیں؟

  پڑھنا نہ بھولیں:خوف کی فضا کی ذمہ دارعدلیہ بھی ہے: جسٹس شوکت صدیقی 

شہباز شریف نے کہا کہ سرگودھا میں جہاں بھی ہمارے نمائندوں سے کوتاہی ہوئی میں معذرت چاہتاہوں، حکومت ملی تو سرگودھا کو لاہور جیسا بناؤں گا۔ شہباز شریف نے کہا کہ عمران خان کہتا ہے شہباز شریف بہت خطرناک آدمی ہے عمران خان تمہیں بہت دیر بعد پتا چلا ہے۔

انہوں نے کہا کہ عمران خان ایک لمحے کہے گا کالج بنا کردوں گا، اگلے منٹ میں کہے گا نہیں بناکردوں گا، 25 جولائی کو شیر پر ٹھپا لگا کر عمران خان کی سیاست کو ٹھپ کردیں۔

شازیہ بشیر

Content Writer