بھارتی دراندازی،پاکستان نے بھی بڑا فیصلہ کرلیا



اسلام آباد(24نیوز)قومی سلامتی کمیٹی نے بھارتی دعوے کو مسترد کردیا ہے،وزیراعظم عمران خان کی زیرصدارت قومی سلامتی سےمتعلق اجلاس ختم  ،بھارتی دراندازی کو عالمی سطح پر اٹھانے کا فیصلہ کرلیا گیا ہے،وزیر اعظم نے کمانڈ آف اتھارٹی کا اجلاس بلا لیا ہے،عالمی برادری کو واقعے کی جگہ کا دورہ کرایا جا ئے گا،اجلاس میں عوام کو اعتماد میں لینے کے لیے پارلیمنٹ کا مشترکہ اجلاس ہوگا۔

بھارت کی دراندازی کے معاملے پر وزیراعظم عمران خان کی زیر صدارت اعلیٰ سطح کا ہنگامی اجلاس ہوا جس میں آرمی چیف جنرل قمر جاوید باجوہ، وزیر خارجہ شاہ محمود قریشی، وزیر دفاع پرویز خٹک اور سینئر عسکری حکام بھی شریک ہوئے۔ اعلامیے کے مطابق اجلاس میں بھارتی دعوے کی مذمت کی گءی۔

ذرائع کے مطابق اجلاس میں بھارتی دراندازی کے بعد آئندہ کے لائحہ عمل پر تفصیلی غور کیا گیا، اس دوران وزیر خارجہ شاہ محمود قریشی نے بھارتی طیاروں کی دراندازی کے بعد کی صورتحال پر بریفنگ دی جب عسکری قیادت نے کسی بھی صورتحال سے نمٹنے کے لیے اپنی تیاریوں سے آگاہ کیا، اجلاس کو پاک فضائیہ کے طیاروں کے فوری رسپانس کے حوالے سے بھی بریف کیا گیا۔سیکیورٹی حکام نے بریفنگ میں بتایا کہ زمینی اور فضائی سرحدی نگرانی کا مضبوط میکنزم موجود ہے۔

ذرائع کے مطابق اجلاس میں بھارتی فضائی دراندازی کا معاملہ فوری طور پر عالمی سطح پر اٹھانے کا فیصلہ کیا گیا جس کے تحت پاکستان یہ معاملہ او آئی سی، دوست ممالک اور اقوام متحدہ میں فوری طور پر اٹھائے گا،اجلاس میں فیصلہ کیا گیا کہ وزیر خارجہ شاہ محمود قریشی معاملے کو عالمی سطح پر اٹھانے کے لیے رابطے کریں گے۔

اجلاس میں یہ بھی فیصلہ کیا گیا کہ پارلیمنٹ کو اعتماد میں لینے کے لیے مشترکہ اجلاس بلایا جائے گا۔

اظہر تھراج

Senior Content Writer