پی ایس ایل3 : کراچی کنگز کی جیت، لاہور قلندرز 27 رنز سے ہارگئے


دبئی(24نیوز) پاکستان سپر لیگ کے تیسرے ایڈیشن کے آٹھویں میچ میں کراچی کنگز نے مقررہ 20 اوورز میں 159 رنز اسکور کیے جس کے جواب میں لاہور قلندرز کی ٹیم 19ویں اوور میں 132 رنز بناکر آؤٹ ہوگئی۔

تفصیلات کے مطابق سنیل نارائن اور کپتان برینڈن مکلم نے اننگز کا آغاز کیا مگر عثمان شنواری نے دوسری ہی گیند پر سنیل نارائن کو پویلین واپس بھیج دیا۔پہلے اوور میں وکٹ گرنے کے بعد فخر زمان اور میکلم نے جارحانہ کھیل کا مظاہرہ کرتے ہوئے 6 اووورز میں 68 رنز بٹورے، اس دوران میکلم نے 2 چھکے بھی لگائے مگر ساتویں اوور میں شاہد آفریدی نے فخرزمان کو پویلین واپس بھیج دیا وہ 19 رنز بناسکے۔ اگلے ہی اوور میں میکلم بھی 30 گیندوں پر 44 رنز کی اننگز کھیل کر عماد وسیم کا شکار بن گئے۔

یہ بھی پڑھئے: ملتان سلطانز نے لاہورقلندرز کو 43 رنز سے شکست دیدی
بعد ازاں شاہد آفریدی نے اپنی جادوئی بولنگ سے لاہور قلندرز کی بیٹنگ کو تباہ کردیا، آفریدی نے پہلے عمر اکمل کو 6 اور پھر سہیل اختر کو 9 رنز پر آؤٹ کیا اور اپنی ٹیم کو میچ میں واپس لے کر آئے جب کہ آغا سلمان بھی 15 رنز کے مہمان ثابت ہوئے۔ وکٹ کیپر بیٹسمین دنیش رامدین بھی کافی دیر تک وکٹ پر موجود رہے مگر وہ خاطر خواہ کارکردگی دکھانے میں ناکام رہے اور 19 گیندوں پر صرف 11 رنز ہی بناسکے۔
کراچی کنگز کی جانب سے شاہد آفریدی اور عثمان شنواری نے 3،3 جب کہ ملز نے 2 اور محمد عرفان جونیئر، عماد وسیم نے ایک ایک وکٹ حاصل کی۔
اس سے قبل کراچی کنگز کے کپتان عماد وسیم نے ٹاس جیت کر پہلے بیٹنگ کا فیصلہ کیا۔ جوئے ڈینلی اور خرم منظور نے اننگز کا آغاز کیا جب کہ لاہور قلندرز کی جانب سے سہیل خان نے پہلے اوور میں 9 رنز دیے۔