سلائی مشینوں سے جائیدادیں بنائیں:علیمہ خان


اسلام آباد( 24نیوز )امریکہ میں جائیداد سامنے آنے پر وزیر اعظم کی بہن بول پڑیں،علیمہ خان کہتی ہیں کہ سلائی مشینوں کی کمائی سے جائیدادیں بنائیں اور تمام جائیدادیں ظاہر کی ہوئی ہیں،

پاکستانیوں کی بیرون ملک جائیداد اور اکائونٹس سے متعلق کیس میں وزیراعظم کی ہمشیرہ علیمہ خان سپریم کورٹ میں پیش ہوئیں۔

اس موقع پر انہوں نے صحافیوں کی طرف کیے گئے سوالات کے جواب دیے،انہوں نے کہا ہے کہ میں نے اپنی تمام جائیدادیں ظاہر کی ہوئی ہیں جن میں امریکا میں جائیداد بھی ظاہر کی ہے،ایک صحافی نے ان سے سوال کیا کہ کیا آپ نے مشینوں کی کمائی سے جائیدادیں بنائیں؟ اس پر انہوں نے کہا کہ جی، پاکستان میں بہت خواتین سلائی مشین سے روزگار کما رہی ہیں، میری مشینوں کا مذاق اڑایا گیا ہے۔

علیمہ خان نے مزید کہا کہ میری ویلتھ اسٹیٹمنٹ چیک کر لیں، میں بیس سال سے کام کر رہی ہوں، آپ رکارڈ چیک کرلیں تمام چیزیں ریکارڈ پر موجود ہیں، جب خاتون کام کرتی ہے تو ہم اس کی سلائی مشینوں کا بھی مذاق اڑاتے ہیں، سلائی مشینیں ہماری ایکسپورٹ کا بڑا حصہ ہیں اور لاکھوں لوگ کام کررہے ہیں، پاکستان میں فارن ایکسچینج ایکسپورٹ سے آرہا ہے اور سلائی مشینوں سے آ رہا ہے۔

ایک اور صحافی نے سوال کیا کہ آپ کو اپوزیشن کی جانب سے عمران خان کا بے نامی دار ٹھہرایا جا رہا ہے؟اس پر علیمہ خان نے جواب دیا کہ میں اس حوالے سے اپنا بیان دے چکی ہوں، مجھے عمران خان کی طرف سے نہیں بلکہ والدین کی طرف سے حصہ ملا۔